ENCIRKLIGATA da automobil-voyegi e kun litoro kom westa frontiero,
Bay Ridge aspektas su-kontenata sur mapo: insulo an la bordo di
Brooklyn. Ma la vicineyo nule esas insulatra. Italiana specalajo-butiki,
turka dineerii, norvegiana delikatajerii e libanana restorerii
alonge Triesma e Quaresma Avenui sugestas lua riche diversa
habitantaro. E la stradi di Bay Ridge semblas simile mixita -
tote urbana en un bloko, preurbana en la nexta*.
DUM LA ORA EPOKO, la libertempa klaso venis adhike por somero-sporti e bayo-venteti che vakanceyi quale la 'Crescent Athletic'-Klubo. Henry C. Murphy, l'urbestro di Brooklyn kande ol esis ipsa urbo, e plu tarde stato-senatano, havis granda domeno che la nordwesta angulo di Brooklyn. Posa proprietanto, Eliphalet Bliss, ofris la tereno, stabli, domo ed observo-turmo al urbo, e per l'inicio da Robert Moses dum la 1930a yari ol divenis la 10-hektara 'Owls Head'-Parko - kun florifanta arbori, aquo-vidindaji e, nunadie, basketbaleyi e "skate"-parki. Malgre ke l'edifici da sro Bliss destruktesis en 1940, lua parafo restas sur la pordegi.
LA FAMO DI HENRY C. MURPHY transvivas en Senator-Strado, developuro de rango-domi nomizita pro il e konstruktita de 1906 til 1912. Multa de ca nov-Renesanca kurva-fronta-ed-inklinanta-stila "brunpetra" domi esas bele prezervita; Nro. 331, kun tintita fenestri e shablono de folii super lua pordo, mem havas gas-lampo vaciletant extere. Fred Eisenla di Eisenla & Carlson desegnis omna domi ecepte du; lua firmo anke responsas pri la eleganta apartament-edifico che 145 Prospect Park West en Park Slope, e pri la min grandioza ma admirinde progresiva Finlandana "co-op"-i en Sunset Park.
INTER IDENTA RANGI de atachita brika domi, Bay Ridge revelas sua eklektika latero. Turmeti e tekti krenelizita fortigas apartament-edifici en Shore-Strado; fiera petra leoni gardas sennombra inklini, e medalioni de Romana kapi e feroca agli ornas la muri di moderna palaci. Exter sua Viktoriana ligna domo che 7901 Ridge-Bulvardo, George Kortsolakis, greka enmigrinto, kreis topografiala mapo di Kriti ek trovita objekti e peci de betono e kovris ol per plura-kolora tekto e "Plexiglas"-a flanki: templo al olima lando.
LA 'MIELKUKO-DOMO', konstruktita en 1917, esas forsan la maxim neordinara del plu granda libere-stacanta rezideyi proxim Shore-Strado. L'arkitekto James Sarsfield Kennedy desegnis ol por Howard E. Jones, navala komercisto, ma la artala-stila domo semble plu multe fitas la Tri Ursi - se lia rakonto inkluzus "porte-chochere" e paviliono. Konstruktita ek stoni nereguloza, ol havas ondatra tekto qua aspektas unesma-regarde paliizita, ma esas konstruktita ek asfalta teguli. Neexpektat ecepte en feo-rakonto, la domo esas, adminime, heme en vicineyo di neordinara apudpozi.
Da Sarah Harrison Smith
ek la jurnalo 'New York Times', 5ma aprilo 2013
James Chandler 15-Jun-16