Mesajeti esas kolekturo di plura texteti sendita en mesaji ad Idolisto da James Chandler.
Terence McKenna: Kulturo NE es Vua Amiko (2006)
Civilizuro es sis bilion homi, qui omna probas kontentigar su per stacar
sur la shultri di altri e pedfrapar lia denti. Ol ne es plezanta
situaciono*. ...
L'Okuli di Timo e l'Okuli di Amo (2004)
La mondo es quale amuz-voyajo che tem-parko e kande on selektas
voyajar on kredas ke ol es reala nam nia menti es tante povoza. E
l'amuz-voyajo acensas e decensas e cirkuladas, ol ecitas ed ol
es tre brilante koloroza ed ol es tre lauta e juebla, dum kelka tempo. ...
David Lynch publike questionas 9/11 (2006)
Film-direktisto e kult-ikono David Lynch expresis publike sua questioni
pri l'oficala expiko dil teror-ataki di 11ma septembro 2001. Lynch
asertis ke la nerespondita questioni desquietigas il: pri la
Pentagon-atako, la kolapso dil edifici en Nov-York, e la stranja fino
di flugo 93 en Pennsylvania. ...
Mesajo de filozofo (2009)
Ni travivas la maxim granda transformo dum homala historio
por lo bona e lo mala, pro la teknologiala developi, l'acelero
di savo, l'acelero di armi-sistemi, la dekado, la boneso:
lo bona, lo mala e lo leda. ...
James Chandler 14-Nov-09
Terence McKenna: Kulturo NE es Vua Amiko
Civilizuro es sis bilion homi, qui omna probas kontentigar su per stacar
sur la shultri di altri e pedfrapar lia denti. Ol ne es plezanta
situaciono*.
Tamen, ni povas regardar ica planeto e vidar ke ni havas la pekunio,
la povo, la medicinala kompreno, la ciencala savo, l'amo e la komuneso,
por produktar sorto di homala paradizo.
Ma ni duktesas da le minima inter ni: le minim inteligenta, le minim
nobla, le minim vizionema, e ni ne kontre-luktas la deshumaniganta
valori quin ni recevas kom direkt-ikoni.
Kulturo ne es vua amiko. Kulturo es por la konveno di altri e la
konveno di diversa institucuri, eklezii, firmi, skemi por kolektar
imposti, e tale plus.
Ol ne es vua amiko. Ol insultas vu. Ol despovigas vu, ol uzas ed
abuzas vu. Nulu traktesas bone da kulturo. Tamen, ni gloriizas la
kreiva potencialo dil individuo, la yuri dil individuo, ni komprenas ke
la sentata prezenteso di experienco es lo maxim importanta.
Ma la kulturo es perversa, ol fetishigas objekti, kreas konsumero-manio,
predikas senfina formi di falsa feliceso, senfina formi di falsa kompreno
forme di religii e stulta kulti. Ol invitas homi diminutar su e
deshumanigar su per kondutar quale mashini, memo*-procedigili di memi*
recevata de Madison-Avenuo e Hollywood e tale plus.
Quale ni povas kontre-luktar? Segun me, per krear arto. La homaro ne
es sur ica planeto por laborachar en la fango. O la deo qua pozis ni
sur ica planeto por laborachar en la fango, ne es deo quan me volas
konocar - ol es ulsorta gnostika demono, ulsorta kanibalista demiurgo,
quan ni devas tote renuncar e refuzar.
Per par-depresar l'arto-pedalo, ni vere maximigas nia humaneso, e divenas
multe plu necesa e nekomprenebla dal mashini.
Terence McKenna
L'Okuli di Timo e l'Okuli di Amo
Da Bill Hicks
La mondo es quale amuz-voyajo che tem-parko e kande on selektas
voyajar on kredas ke ol es reala nam nia menti es tante povoza. E
l'amuz-voyajo acensas e decensas e cirkuladas, ol ecitas ed ol
es tre brilante koloroza ed ol es tre lauta e juebla, dum kelka tempo.
Kelki amuz-voyajis longatempe e li questioneskas: ka co es reala o kad
ol es nur amuz-voyajo?
Ed altri rimemoris, e li retrovenas a ni e li dicas: ho, ne suciez,
ne timez, nultempe, nam: ico es nur amuz-voyajo. E ni...
ocidas ta homi.
"Tacigez il. Ni havas grand interesto en ca amuz-voyajo. Tacigez il!
Regardez mea sucio-frunsi. Regardez mea granda banko-konto, e mea
familio... Ico mustas esar reala."
Ol es nur amuz-voyajo, e ni povas chanjar ol irgatempe se ni volas.
Ol es nur selekto, nul esforco, nula laboro, nul employeso, nula
pekunio-konservo, selekto nun inter timo ed amo.
L'okuli di timo volas ke vu sekurigez vua pordi per plu granda seruri,
komprez fusili, exkluzez vu, l'okuli di amo vicee vidas ni omna kom un.
Yen quale ni povas chanjar la mondo, nun, a plu bona voyajo: prenar
omna pekunio quon ni spensas ye armi e defenso singlayare e vicee
spensar ol por nutrar, vestizar ed edukar la povri dil mondo, to quon
ol atingus multafoye, ne un homo exkluzata, e ni povos explorar spaco
kune, ed interna ed extera, por sempre, pacoze.
Bill Hicks
David Lynch publike questionas 9/11
Film-direktisto e kult-ikono David Lynch expresis publike sua questioni
pri l'oficala expiko dil teror-ataki di 11ma septembro 2001. Lynch
asertis ke la nerespondita questioni desquietigas il: pri la
Pentagon-atako, la kolapso dil edifici en Nov-York, e la stranja fino
di flugo 93 en Pennsylvania.
Che la televizion-programo VPRO Wereldgasten en Nederlando, 3ma decembro,
Lynch diskutis pri la dokumentalo 'Loose Change' da Dylan Avery. Il
dicis:
"Ne esas to quon on dicis, esas la kozi qui koaktas on vidar l'eventi
diferante. E por me ta kozi es: la truo en la Pentagon es tro mikra
por aviono, la herbo ne domajesis, e la guvernerio ne montras l'aviono
dum ke multa kameri fotografis ol."
"Che la Mondala Komerco-Centro, tri edifici kolapsis, quale demolisi,
e du frapesis da aviono, ma la triesma on dicis "ka ni tirez ol?" e li
tiris ol ed ol aspektis same kam l'altra du. To desquietigas me."
"En Pennsylvania, l'aviono falis, esis nur truo en la tero, nula
eskombri, nula glit-marki, nula fendo en la tero, e nulu ja explikis to."
"Do omnaloke esas questioni, pro ca dokumentalo."
Ka la guvernerio Usana es komplica?
"To es tro granda, homi ne povas pensar pri to. To es tro granda. Nulu
volas pensar pri to."
Lynch direktis multa famoza klasiki cinemala quale Eraserhead, Dune, The Elephant Man e Mulholland Drive. Il anke kreis la televizion-serio
Twin Peaks dum la 1980a yari.
Lynch sequas altra famozi qui publike questionis 9/11, quale
Richard Linklater, Jesse Ventura, Matthew Bellemy, Ed Asner
e Charlie Sheen.
Segun infowars.net/VPRO Wereldgasten
Mesajo de filozofo
Mesajo a la homaro de filozofo usana Alex Jones:
Ni travivas la maxim granda transformo dum homala historio
por lo bona e lo mala, pro la teknologiala developi, l'acelero
di savo, l'acelero di armi-sistemi, la dekado, la boneso:
lo bona, lo mala e lo leda. Do savez ke vu esas parto di
nekredebla tempo historiala, cesez spektar la sporti, la
situeso-komedii, to omna quo nule importas, e rikonektez kun
realeso.
Poslasez vua marko, komunikez kun la futuro, agez bonaji por
la socio e homaro, serchez la vereso. Ed amez la homaro,
savez ke vu esas parto di ulo plu granda, savez ke ni esas
nia ancestri e ni esas nia futura decendanti, e ke ni omna
esas un speco, ni esas individui ma ni esas anke parto di
plu granda tapeto, ed en to vu certe nultempe mortos - ecepte
se la speco domajesos nerevokeble dal kriminozi qui jeras la
sistemo.
Poslasez la speco en plu bona stando, kam kande vu arivis che
ol. Me pregas por vi omna qui amas libereso, e por homi qui
amas deco e kreiveso e honoro ed inocenteso. Me esas hike
kun vi, vi esas kun me, ni esas kune en historio, dum ca
instanto e por sempre.
Alex Jones
James Chandler 15-Jan-09
Seattle 1999
Back to the International Language Ido